Back

Vishon

E palabra Kinani tabata usá antes ayá pa hende ku tin mes nòmber ku otro i esaki ta parti di Kinani Language Enrichment su vishon. Nos ta sigur ku, meskos ku nifikashon di e palabra, nos tin algu en komun ku nos klientenan. Konvensí di esaki nos ta pone nos mes komo un brùg pa yuda nos klientenan alkansá nan metanan. Ku nos produktonan nos ta aportá na fasilitá e proseso di komunikashon na un manera plasentero, pèrkurando semper ku esaki tin un balor agregá na e hende komo persona, i no únikamente e profeshonal òf interesado.

Mishon

Kinani Language Enrichment t’ei pa yuda fasilitá su proseso di komunikashon i desaroyo personal/profeshonal di su klientenan. Huntu ku esaki Kinani Language Enrichment ta konvensí ku e t’ei pa duna un aporte na posishon di papiamentu, komo un idioma krioyo i di minoria, tantu den mundu komo serka e papiadónan ku tin papiamentu komo idioma materno òf di dos idioma.

Nos dosentenan

Kinani Language Enrichment ta konta ku un tim di dosente ku ta karakterisá pa ta personanan dediká i pashoná tantu den loke nan ta hasi komo ku den e aspekto di desaroyo kontinuo di e ser humano. Nan amor pa kompartí nan konosementu, disfrutá di loke nan ta hasi i yuda e ser humano sigui desaroyá ta algun di e karakterístikanan úniko ku ta resaltá di e tim di profeshonal di Kinani.

Nos tim di tradukshon

Tradukshon ta eksigí konosementu di idioma pero tambe eksaktitut den trabou, i esaki ta loke ta karakterisá Kinani Language Enrichment su tim di traduktor. Meskos ku e dosentenan, e tim di traduktor ta dominá diferente idioma, loke ta hasi posibel pa por brinda e servisio di tradukshon pa e idiomanan ingles, hulandes, spañó i papiamentu. Nos no tin un traduktor huramentá den tim, pero semper sa di rekomendá un òf otro kolega den e área ku si ta hasi esaki.

error: Content is protected !!